پیپلزپارٹی کی بھی مولانا فضل الرحمان کے بیانات پر شدید تنقید

پاکستان پیپلز پارٹی (PPP) نے جمعیت علمائے اسلام (ف) کے سربراہ مولانا فضل الرحمان کی جانب سے سکیورٹی صورتحال پر دیے گئے بیانات کو شدید تنقید کا نشانہ بناتے ہوئے انہیں ‘مایوس کن’ قرار دیا ہے۔

سندھ کے سینئر وزیر اور پیپلز پارٹی کے رہنما شرجیل انعام میمن نے اپنے ایک جاری بیان میں کہا کہ مولانا فضل الرحمان جیسے تجربہ کار اور سینئر سیاست دان سے ایسے بیانات کی توقع نہیں تھی، خاص طور پر جب وہ خود بھی ماضی میں دہشت گردی کی ہولناکی کا سامنا کر چکے ہیں۔ انہوں نے کہا کہ پیپلز پارٹی نے بھی دہشت گردی کے خلاف جنگ میں سب سے زیادہ نقصان اٹھایا اور قربانیاں دی ہیں، لہٰذا امید کی جاتی ہے کہ مولانا فضل الرحمان دہشت گردی کے خلاف ایک واضح اور غیر مبہم مؤقف اختیار کریں گے۔

شرجیل میمن نے پاکستان تحریک انصاف (PTI) کو بھی آڑے ہاتھوں لیتے ہوئے کہا کہ پی ٹی آئی نے اقتدار کے دوران دہشت گردوں کے لیے نرم گوشہ رکھا اور بانی پی ٹی آئی ان کے دفاتر کھلوانے کی باتیں کرتے رہے، جس کی وجہ سے معصوم شہریوں کا خون بہتا رہا اور ہمارے سکیورٹی اہلکار شہید ہوئے۔ انہوں نے کہا کہ پی ٹی آئی حکومت نے اپنے انہی غلط فیصلوں کی وجہ سے اپنا اقتدار گنوایا اور آج انہیں اپنے ہی فیصلوں کے نتائج کا سامنا کرنا پڑ رہا ہے۔