سانحہ کارساز کو 19 برس بیت گئے، المناک واقعہ کا دکھ آج بھی تازہ

پاکستان پیپلز پارٹی کی چیئرپرسن اور سابق وزیراعظم شہید محترمہ بینظیر بھٹو کے استقبالی قافلے پر ہونے والے ہولناک سانحہ کارساز کو انیس برس بیت گئے ہیں، تاہم اس دلخراش واقعے کے زخم اور دکھ آج بھی تازہ ہیں۔

18 اکتوبر 2007ء کو جلاوطنی ختم کر کے وطن واپس آنے والی قائد بینظیر بھٹو کے استقبال کے لیے کراچی ایئرپورٹ سے کارساز تک عوام اور جیالوں کا ایک سمندر امڈ آیا تھا۔ کارواں جب کارساز کے قریب پہنچا تو اچانک یکے بعد دیگرے دو تباہ کن دھماکے ہوئے، جس سے جشن کا سماں لمحوں میں سوگ میں ڈوب گیا۔ اس دہشت گرد حملے میں 150 سے زائد افراد جاں بحق اور سیکڑوں زخمی ہوئے تھے۔

ڈپٹی اسپیکر سندھ اسمبلی انتھونی نوید اور ترجمان سندھ حکومت سعدیہ جاوید نے سانحے کی برسی کے موقع پر شہداء کو خراجِ عقیدت پیش کرتے ہوئے کہا کہ سانحہ کارساز پاکستان کی سیاسی و جمہوری تاریخ کا ایک سیاہ اور المناک ترین باب ہے، جس میں جمہوریت کے پروانوں نے اپنی جانوں کا نذرانہ پیش کیا۔ شہداء کے لواحقین اور پارٹی کارکنان ہر سال 18 اکتوبر کو یادگارِ شہداء پر حاضری دے کر پھول چڑھاتے ہیں اور فاتحہ خوانی کرتے ہیں۔