موسمیاتی تبدیلی سے نمٹنے کیلئے سوئس حکومت کے تعاون کے خواہاں ہیں: گورنر پنجاب

گورنر پنجاب سردار سلیم حیدر خان نے کہا ہے کہ عالمی سطح پر آلودگی میں کم ترین حصے کے باوجود پاکستان موسمیاتی تبدیلیوں سے شدید متاثر ہو رہا ہے اور اس چیلنج سے نمٹنے کے لیے سوئس حکومت کے تعاون کا خواہاں ہے۔ گورنر ہاؤس لاہور میں سوئٹزرلینڈ کے سفیر سٹیفن رے سے ملاقات کے دوران انہوں نے کہا کہ پاکستان کو سیلاب اور زراعت کو درپیش نقصانات کا سامنا ہے، لہٰذا سائنسدانوں اور طلبہ کے تبادلے کے پروگرامز (Exchange Programs) سے دوطرفہ تعلقات کو مزید وسعت ملے گی۔ گورنر پنجاب نے سوئس کمپنیوں کو پاکستان کے آئی ٹی شعبے میں سرمایہ کاری کی دعوت دی۔ اس موقع پر سوئس سفیر نے پاکستان کی جغرافیائی اہمیت کا اعتراف کرتے ہوئے تجارت، تکنیکی شعبوں اور طلبہ کے وفود کے تبادلوں کے ذریعے باہمی تعاون بڑھانے کے عزم کا اعادہ کیا۔