ایمنڈ کے انتخابات، اظہر عباس صدر اور طارق محمود جنرل سیکریٹری منتخب

ایسوسی ایشن آف الیکٹرانک میڈیا ایڈیٹرز اینڈ نیوز ڈائریکٹرز (ایمنڈ) کے انتخابات کے نتیجے میں اظہر عباس صدر اور طارق محمود جنرل سیکریٹری منتخب ہو گئے ہیں۔ انتخاب میں محمد عثمان اور میاں طاہر نائب صدور، ریحان احمد اور ندیم جمال جوائنٹ سیکریٹریز جبکہ شہاب محمود فنانس سیکریٹری منتخب ہوئے ہیں۔ نومنتخب جنرل سیکریٹری طارق محمود کے مطابق جنرل کونسل اجلاس میں پیکا ایکٹ اور نیشنل سائبر کرائم انویسٹی گیشن ایجنسی (NCCIA) کے بے جا استعمال اور صحافتی آزادیوں پر بڑھتی ہوئی پابندیوں پر شدید تشویش کا اظہار کیا گیا، جبکہ یوٹیوبرز کے غیر ذمہ دارانہ طرزِ عمل اور ذاتی ایجنڈے کی بھی مذمت کی گئی۔ ایمنڈ نے اعلامیہ جاری کیا ہے کہ نئی ایگزیکٹو کمیٹی کے اجلاس میں صحافت کے تحفظ اور آئندہ کے مضبوط لائحہ عمل کا باضابطہ اعلان کیا جائے گا۔