محمود اچکزئی کی وزیراعظم سے ملاقات کیلئے تیسری جگہ مقرر کرنے کی شرط مسترد

حکومت نے قومی اسمبلی میں قائدِ حزبِ اختلاف محمود خان اچکزئی کی جانب سے وزیراعظم سے ملاقات کے لیے کسی ‘تیسری جگہ’ کا انتخاب کرنے کی شرط کو صریحاً مسترد کر دیا ہے۔

وزیراعظم کے مشیر رانا ثناء اللہ نے ایک پالیسی بیان میں واضح کیا کہ وزیراعظم اور اپوزیشن لیڈر کے درمیان آئینی و سیاسی امور پر ملاقات صرف اور صرف وزیراعظم ہاؤس میں ہی ہوگی۔ انہوں نے کہا کہ وزیراعظم ہاؤس کسی کی ذاتی ملکیت نہیں بلکہ ریاست کا آئینی ایوان ہے، اس لیے ملاقات کے لیے کسی الگ مقام کا مطالبہ بالکل غیر مناسب اور ضد پر مبنی ہے۔

رانا ثناء اللہ نے بتایا کہ چیف الیکشن کمشنر اور الیکشن کمیشن کے ارکان کی تقرری کے حوالے سے وزیراعظم کی جانب سے اپوزیشن لیڈر کو دو باضابطہ خطوط ارسال کیے جا چکے ہیں اور حکومت ان کے جواب کی منتظر ہے۔ پاکستان تحریک انصاف (PTI) کے ساتھ سیاسی گفتگو پر بات کرتے ہوئے ان کا کہنا تھا کہ غیر مشروط مذاکرات تو ممکن ہیں لیکن ایمرجنسی واپس لینے کی شرط پر کوئی بات چیت نہیں ہوگی۔ انہوں نے واضح کیا کہ دہشت گردی کے خلاف جنگ پوری قومی کمٹمنٹ کے ساتھ لڑی جائے گی اور اگر اپوزیشن اس قومی مقصد میں تعاون کرے تو بات چیت کے راستے کھلے ہیں۔