سانحہ پشاور: سکول کی عمارت ناقص تعمیر کے باعث منہدم ہوئی، رپورٹ پولیس چیف کو ارسال

پشاور میں سانحہ دیر کالونی کے دوران اسکول کی عمارت گرنے سے متعلق ایس ایس پی آپریشنز نے ابتدائی تحقیقاتی رپورٹ سی سی پی او پشاور کو ارسال کر دی ہے۔ رپورٹ کے مطابق تھانہ آغا میر جانی کو صبح 9 بج کر 5 منٹ پر حادثے کی اطلاع ملی، جس پر پولیس اور ریسکیو 1122 کی ٹیمیں فوری طور پر جائے وقوعہ پر پہنچیں۔ پولیس رپورٹ میں انکشاف کیا گیا ہے کہ اسکول کی عمارت انتہائی بوسیدہ اور ناقص میٹریل سے تعمیر کی گئی تھی، اور عمارت کی خراب حالت کے حوالے سے تحریری شکایات کے باوجود اسکول انتظامیہ کی جانب سے کوئی اصلاحی قدم نہیں اٹھایا گیا۔ پولیس حکام کے مطابق واقعے کا مقدمہ درج کر لیا گیا ہے اور غفلت کے مرتکب ذمہ داران کے تعین کے لیے مزید قانونی و علمی تحقیقات کا سلسلہ جاری ہے۔