دبئی میں گرج چمک کے ساتھ موسلادھار بارش، ورک فرام ہوم نافذ، فلائٹ آپریشن متاثر

دبئی کے مختلف علاقوں میں گرج چمک کے ساتھ ہونے والی موسلادھار بارش کے باعث معمولاتِ زندگی شدید متاثر ہو گئے ہیں۔

شدید بارش اور خراب موسمی صورتحال کے پیش نظر ورک فرام ہوم پالیسی نافذ کر دی گئی ہے، جبکہ پرائیویٹ سیکٹر کو بھی ریموٹ ورک اختیار کرنے کی ہدایت جاری کر دی گئی ہے۔ حکام کے مطابق صرف انتہائی ضروری عملہ ہی دفاتر میں حاضری دے گا۔

محکمہ موسمیات کی جانب سے دبئی اور ابو ظبی میں شدید موسم کی وارننگ بھی جاری کی گئی ہے، جبکہ شہریوں کو احتیاطی تدابیر اختیار کرنے کا مشورہ دیا گیا ہے۔

خراب موسم کے باعث دبئی کے معروف تفریحی مقامات گلوبل ولیج اور عین دبئی کو عارضی طور پر بند کر دیا گیا ہے، جبکہ اسکائی ڈائیو کی تمام سرگرمیاں بھی معطل کر دی گئی ہیں۔

موسم کی خرابی اور تیز بارش کے باعث فلائٹ آپریشن بھی متاثر ہوا ہے۔ دبئی ائیرپورٹ پر آنے اور جانے والی متعدد پروازیں منسوخ جبکہ کئی پروازیں تاخیر کا شکار ہیں۔

دبئی پولیس نے شہریوں کو غیر ضروری سفر سے گریز کرنے کی ہدایت جاری کرتے ہوئے کہا ہے کہ احتیاطی تدابیر پر عمل کیا جائے۔ اسی طرح دبئی ائیرپورٹ انتظامیہ نے مسافروں کو ممکنہ تاخیر کے پیش نظر وقت سے پہلے ائیرپورٹ پہنچنے کا مشورہ دیا ہے۔

حکام کے مطابق دبئی میں موسم جمعے کی رات سے بتدریج بہتر ہونے کی توقع ہے۔