گورنر پنجاب نے اپنی استاد کو گورنر ہاؤس میں اپنی کرسی پر بٹھا دیا

گورنر پنجاب سردار سلیم حیدر خان نے استاد اور شاگرد کے رشتے اور احترام کی اعلیٰ مثال قائم کرتے ہوئے اپنی بچپن کی معلمہ کو خراجِ تحسین پیش کیا اور انہیں گورنر ہاؤس میں اپنی سرکاری کرسی پر بٹھا دیا۔

اس جذباتی اور احترام سے بھرپور موقع پر میڈیا سے گفتگو کرتے ہوئے گورنر پنجاب نے کہا کہ یہ معزز شخصیت صرف ان کی ٹیچر ہی نہیں بلکہ ان کی ماں کا درجہ رکھتی ہیں۔ انہوں نے بتایا کہ وہ محض 4 سال کی عمر میں ان کی زیرِ سرپرستی گئے تھے اور بورڈنگ اسکول منتقل ہونے سے قبل پانچویں جماعت تک انہوں نے ہی ان کی تربیت کی اور پڑھایا۔

سردار سلیم حیدر خان نے جذبات کا اظہار کرتے ہوئے کہا کہ ان کی ٹیچر نے انہیں اپنے سگے بچوں کی طرح پالا اور آج وہ زندگی میں جس مقام پر بھی ہیں اس کی تمام بنیاد انہی کی مرہونِ منت ہے۔ گورنر پنجاب نے مزید کہا کہ اسی عظیم الشان احترام اور محبت کے اعتراف میں انہوں نے اپنی معلمہ کو گورنر کی مسند پیش کی تاکہ آنے والی نسلوں کو استاد کے مقام اور عزّت کا پیغام مل سکے۔