امریکی بحری ناکہ بندی کے باوجود ایران جیٹ فیول میانمار پہنچانے میں کامیاب

ایران امریکی بحری ناکہ بندی کے باوجود جیٹ فیول میانمار پہنچانے میں کامیاب ہوگیا، جبکہ ایرانی مائع پیٹرولیم گیس (ایل پی جی) کی متعدد کھیپیں بھی خطے سے باہر روانہ کیے جانے کا انکشاف ہوا ہے۔

خبر رساں ادارے رائٹرز کے مطابق ایرانی جیٹ فیول لے جانے والا ایک ٹینکر ستمبر میں میانمار پہنچا۔ رپورٹ میں بتایا گیا ہے کہ امریکی بحری ناکہ بندی کے باوجود ایران سے ایل پی جی کی متعدد کھیپوں کی بیرونِ خطہ ترسیل بھی جاری رہی۔

رائٹرز کی رپورٹ کے مطابق امریکی بحری ناکہ بندی سے ایران کی خام تیل کی برآمدات بڑی حد تک متاثر ہوئی ہیں، تاہم جیٹ فیول اور ایل پی جی کی ترسیل مکمل طور پر نہیں رکی۔

رپورٹ میں یہ بھی بتایا گیا ہے کہ امریکا نے 2023 میں میانمار کے جیٹ فیول سیکٹر پر پابندیاں عائد کی تھیں۔ اس تناظر میں ایرانی جیٹ فیول کی میانمار آمد اور ایل پی جی کی ترسیل خطے میں توانائی کی تجارت اور امریکی پابندیوں کے نفاذ سے متعلق اہم سوالات اٹھاتی ہے۔