گورنر فیصل کریم کنڈی کا خیبر پختونخوا پولیس کی تنخواہوں میں اضافے کا اعلان

گورنر خیبر پختونخوا فیصل کریم کنڈی نے ایک ویڈیو پیغام کے ذریعے کے پی پولیس کے شہداء، زخمی اہلکاروں اور ان کے خاندانوں کے لیے معاوضوں اور مراعات میں تاریخی و ریکارڈ اضافے کے ریلیف پیکج کا اعلان کیا ہے۔ نئے پیکج کے تحت کانسٹیبل تا انسپکٹر شہداء کا معاوضہ 1 کروڑ 10 لاکھ سے بڑھا کر 1 کروڑ 70 لاکھ روپے، جبکہ پلاٹ کے بدلے 1 کروڑ 80 لاکھ روپے نقد دینے کی منظوری دی گئی ہے۔ ڈی ایس پی اور اے ایس پی رینک کے لیے معاوضہ ڈھائی کروڑ، گریڈ 18 اور 19 کے لیے 3 کروڑ (پلس ساڑھے 3 کروڑ رہائشی امداد)، اور گریڈ 20 سے اوپر کے شہداء کے لیے معاوضہ ساڑھے 3 کروڑ روپے اور پلاٹ کے بدلے 7 کروڑ روپے مقرر کیا گیا ہے۔ دورانِ ڈیوٹی زخمی اہلکاروں کا پیکج 15 لاکھ، مستقل معذوری پر 50 لاکھ اور شہداء کی بیٹیوں کی شادی کے لیے 10 لاکھ روپے بطور تحفہ دیے جائیں گے۔ گورنر فیصل کریم کنڈی نے پولیس کی تنخواہوں میں اضافے کا اعلان کرتے ہوئے کہا کہ شہداء کے خاندان ہمارا فخر ہیں اور ان کی دیکھ بھال حکومت کی اولین ترجیح ہے۔