ٹرمپ کا ایران پر جوہری ہتھیار استعمال نہ کرنے کا اعلان، زمینی فوج بھیجنے کا امکان بھی مسترد کر دیا

امریکی صدر ڈونلڈ ٹرمپ نے واضح اعلان کیا ہے کہ وہ ایران کے خلاف جوہری ہتھیار استعمال نہیں کریں گے اور نہ ہی خطے میں امریکی زمینی فوج (Ground Troops) بھیجنے کا کوئی ارادہ رکھتے ہیں۔

نیوز میکس (Newsmax) کو دیے گئے ایک انٹرویو میں صدر ڈونلڈ ٹرمپ نے ایران کے ساتھ کشیدگی کے تناظر میں امریکی حکمتِ عملی پر گفتگو کرتے ہوئے کہا کہ وہ ایران کے خلاف ایٹمی ہتھیاروں کے استعمال اور فوجی دستوں کی تعنیاتی سے گریز کریں گے۔ صدر ٹرمپ نے یہ بھی انکشاف کیا کہ امریکا عالمگیر سطح پر جوہری ہتھیاروں کی عدم فراوانی اور خاتمے کے معاملے پر روس اور چین کے ساتھ بھی اعلیٰ سطح پر بات چیت کر رہا ہے۔

یہ بیان ان امریکی میڈیا رپورٹس کے بعد سامنے آیا ہے جن میں دعویٰ کیا گیا تھا کہ پینٹاگون نے ایران کے توانائی کے انفراسٹرکچر اور جوہری تنصیبات کو نشانہ بنانے کے لیے اپنے سب سے بڑے غیر جوہری بم ‘GBU-43/B Massive Ordnance Air Blast’ (MOAB)، جسے ‘مدر آف آل بمز’ بھی کہا جاتا ہے، کے ممکنہ استعمال کے نئے عسکری منصوبے تیار کیے ہیں۔ تاہم دفاعی ماہرین نے شک ظاہر کیا ہے کہ آیا ایسے کسی بھی بم کا استعمال جنگی حکمتِ عملی میں کتنا مؤثر ثابت ہو سکتا ہے۔