امریکا: خریدے گئے پرانے سامان سے دوسری جنگِ عظیم کے بم برآمد

امریکہ میں پرانے اور ناکارہ سامان کی سیل (Garage Sale) سے خریدے گئے چند عام سے ڈبوں میں سے دوسری جنگِ عظیم کے دور کے فعال دستی بم (Live Grenades) برآمد ہوئے ہیں، جس نے علاقے میں شدید خوف و ہراس پھیلا دیا۔

یہ عجیب و غریب واقعہ امریکی ریاست ٹیکساس کے شہر آسٹن میں پیش آیا۔ آسٹن پولیس ایسوسی ایشن کی جانب سے سوشل میڈیا پر جاری کردہ تفصیلات کے مطابق، ایک مقامی شہری نے گھر کے پرانے سامان کی فروخت سے کچھ ڈبے خریدے۔ جب اس نے گھر آ کر ڈبوں کی جانچ پڑتال کی تو ان کے اندر سے 80 سال پرانے دستی بم برآمد ہوئے، جس کے بعد اس نے فوری طور پر سیکیورٹی اداروں کو اطلاع دی۔

اطلاع ملتے ہی آسٹن پولیس ڈیپارٹمنٹ کا بم ڈسپوزل اسکواڈ موقع پر پہنچ گیا۔ ماہرین نے ابتدائی معائنے کے بعد تصدیق کی کہ ڈبوں میں موجود دوسری جنگِ عظیم کے یہ بم اب بھی مکمل طور پر فعال (Live) اور انتہائی خطرناک حالت میں تھے۔ پولیس نے اپنی انسٹاگرام اور دیگر سوشل میڈیا پوسٹس میں واضح کیا کہ دہائیوں پرانے ایسے دھماکا خیز مواد کو سنبھالنا، جس کے کیمیائی استحکام کے بارے میں کچھ علم نہ ہو، بم ڈسپوزل ماہرین کے لیے بھی ایک انتہائی حساس اور خطرناک مرحلہ ہوتا ہے۔ سیکیورٹی اہلکاروں نے تمام دستی بموں کو بحفاظت قبضے میں لے کر ناکارہ بنانے کے لیے محفوظ جگہ منتقل کر دیا ہے۔