پاکستان، جنوبی کوریا اور مصر کے درمیان بڑی سرمایہ کاری کی تیاریاں، دبئی میں اہم ملاقات

پاکستان، جنوبی کوریا اور عرب ممالک کے مابین سہ ملکی اقتصادی تعاون کو فروغ دینے اور اربوں ڈالر کی منڈیوں میں نئی سرمایہ کاری لانے کے امکانات روشن ہو گئے ہیں۔

متحدہ عرب امارات (UAE) میں پاکستانی کاروباری شخصیت ملک منیر اعوان اور عرب افریقی اعلیٰ اقتصادی کونسل کے فرسٹ وائس پریذیڈنٹ سفیر یاسر البخشوان کے درمیان ایک اہم ملاقات ہوئی۔ مصری اخبارات الجمہوریہ اور اخبار الیوم کی رپورٹس کے مطابق، اس ملاقات میں پاکستان، مصر اور دیگر عرب ممالک کے درمیان مشترکہ سرمایہ کاری اور تجارتی تعلقات کی استواری پر تفصیلی گفتگو ہوئی۔

سفیر یاسر البخشوان نے بتایا کہ پاکستانی سرمایہ کار گروپ جنوبی کوریا کی معروف کمپنیوں کے ساتھ اسٹریٹجک شراکت داری کے تحت مشرقِ وسطیٰ میں، بالخصوص مصر میں، بڑے پیمانے پر سرمایہ کاری کی منصوبہ بندی کر رہا ہے۔ اس منصوبے کے تحت زراعت، ٹرانسپورٹ و لاجسٹکس، رئیل اسٹیٹ ڈیولپمنٹ اور سیاحت کے شعبوں کو ترجیح دی جائے گی۔ اس کے ساتھ ہی، عرب افریقی اعلیٰ اقتصادی کونسل نے پاکستان کے اندر بھی نئی عرب سرمایہ کاری لانے کا عزم ظاہر کیا ہے تاکہ عرب و پاکستانی کاروباری اداروں کے مابین اقتصادی تعاون کے ایک نئے دور کا آغاز ہو سکے۔