سندھ میں جدید ایمبریو ٹرانسفر ٹیکنالوجی کے ذریعے مویشیوں کی افزائش نسل کا منصوبہ متعارف

حکومتِ سندھ نے صوبے میں لائیو اسٹاک کے شعبے کو جدید خطوط پر استوار کرنے، مویشیوں کی نسلی افزائش کو بہتر بنانے اور دودھ و گوشت کی پیداوار میں نمایاں اضافے کے لیے جدید ایمبریو ٹرانسفر ٹیکنالوجی (Embryo Transfer Technology) پر مبنی فارورڈ بریڈنگ پروگرام کا باقاعدہ آغاز کر دیا ہے۔

یہ اہم اسٹریٹجک منصوبہ محکمہ لائیو اسٹاک سندھ اور ایک نجی پرائیویٹ لمیٹڈ ادارے کے اشتراک (Public-Private Partnership) سے شروع کیا گیا ہے، جس کا باضابطہ افتتاح صوبائی وزیر برائے لائیو اسٹاک محمد علی ملکانی نے کیا۔ اس موقع پر سیکرٹری لائیو اسٹاک ڈاکٹر کاظم جتوئی، ڈائریکٹر جنرل ڈاکٹر نظیر کلہوڑو اور پرائیویٹ سیکٹر کے اعلیٰ حکام بھی موجود تھے۔

صوبائی وزیر محمد علی ملکانی نے تقریب سے خطاب کرتے ہوئے بتایا کہ روایتی طریقوں کے برعکس ایمبریو ٹرانسفر ٹیکنالوجی کے ذریعے اب محض ایک سال کے اندر اعلیٰ نسل اور زیادہ وزن والے مویشیوں کی افزائش ممکن ہو سکے گی۔ اس ٹیکنالوجی سے نہ صرف مارکیٹ میں معیاری گوشت اور دودھ کی فراہمی بڑھے گی بلکہ فارمرز کی آمدنی اور عیدالاضحیٰ کے موقع پر معیاری مویشیوں کی دستیابی میں بھی نمایاں بہتری آئے گی۔ انہوں نے لائیو اسٹاک فارمنگ کے شعبے میں نجی سرمایہ کاروں کو سرمایہ کاری کی دعوت بھی دی۔