انتظار کریں اور دیکھیں ایران کیخلاف کیا کرتے ہیں، صدر ٹرمپ کی نئی کارروائی کی دھمکی

امریکی صدر ڈونلڈ ٹرمپ نے ایران کی موجودہ سیاسی و عسکری صورتحال پر تبصرہ کرتے ہوئے کہا ہے کہ ایران میں اقتدار کا شیرازہ اس حد تک بکھر چکا ہے کہ وہ خود نہیں جانتے کہ تہران میں مذاکرات اور بات چیت کے لیے کس رہنما سے رابطہ کیا جائے۔

اپنے حامیوں کے ایک اجتماع سے خطاب کرتے ہوئے صدر ڈونلڈ ٹرمپ نے کہا، “میں ڈیل کرنے کا ماہر ہوں اور اسی صلاحیت کی بنا پر انتہائی کامیاب اور امیر بنا ہوں، لیکن اس وقت کسی کو اندازہ نہیں کہ ایران میں اصل قیادت کون کر رہا ہے”۔ انہوں نے یوکرین جنگ کا ذمہ دار سابق صدر جوبائیڈن کی غلط پالیسیوں کو قرار دیتے ہوئے کہا کہ بائیڈن روس کا مسلسل مذاق اڑاتے رہے جس سے تنازع نے جنم لیا۔ ٹرمپ نے اپنے حامیوں سے اپیل کی کہ وہ آنے والے امریکی وسط مدتی انتخابات (Midterm Elections) میں اس طرح بڑھ چڑھ کر ووٹ دیں جیسے وہ خود بیلٹ پیپر پر بطور امیدوار موجود ہوں۔ انہوں نے خبردار کیا کہ اگر ریپبلکنز الیکشن ہار گئے تو عوام سوشل سیکیورٹی، ٹپس پر ٹیکس کی چھوٹ اور دیگر معاشی مراعات سے محروم ہو جائیں گے۔

امریکی صدر نے ایران کے خلاف اپنے آئندہ کے لائحہ عمل کا اشارہ دیتے ہوئے حامیوں سے کہا کہ وہ “انتظار کریں اور دیکھیں کہ امریکہ ایران کے خلاف کیا انتہائی قدم اٹھاتا ہے”۔ ان کا کہنا تھا کہ امریکہ ایران کے معاملے پر اب بہت حد تک حتمی فیصلہ کر چکا ہے اور خود ایرانی حکام بھی اس کے منتظر ہیں۔ صدر ٹرمپ نے واضح اور حتمی موقف اپناتے ہوئے کہا کہ ان کی انتظامیہ کا سب سے بنیادی مقصد یہ ہے کہ ایران کو کسی بھی قیمت پر ایٹمی اور جوہری ہتھیار حاصل کرنے سے روکا جائے۔