سعودیہ پر حملوں میں اپنی سرزمین استعمال نہیں ہونے دیں گے: عراقی وزیراعظم کی یقین دہانی

عراق کے وزیراعظم علی الزیدی اپنے عہدے کا منصب سنبھالنے کے بعد اپنے پہلے باضابطہ سرکاری دورے پر ریاض پہنچ گئے ہیں، جہاں انہوں نے خطے میں امن و استحکام اور دوطرفہ سیکیورٹی تعاون کے حوالے سے اہم مذاکرات کیے ہیں۔

دورے کے دوران عراقی وزیراعظم علی الزیدی نے سعودی ولی عہد اور وزیراعظم شہزاد محمد بن سلمان سے ملاقات کی، جس میں علاقائی صورتحال، کشیدگی اور باہمی سیکیورٹی امور پر تفصیلی تبادلہ خیال کیا گیا۔ عراقی وزیراعظم نے کنگ خالد ایئرپورٹ پر حوثی ملیشیا کی جانب سے کیے گئے حملے کی سخت الفاظ میں مذمت کی اور سعودی قیادت کو واضح یقین دہانی کرائی کہ بغداد اپنی سرزمین کو سعودی عرب یا کسی بھی دیگر ہمسایہ ملک کے خلاف عسکری کارروائیوں اور حملوں کے لیے ہرگز استعمال نہیں ہونے دے گا۔ انہوں نے کہا کہ عراق اور سعودی عرب کے تعلقات خصوصی اسٹریٹجک اہمیت کے حامل ہیں اور دونوں ممالک کا امن ایک دوسرے سے جڑا ہے۔

اس موقع پر سعودی ولی عہد شہزادہ محمد بن سلمان نے بغداد کے ساتھ امن و امان، معاشی ترقی اور سیکیورٹی رابطہ کاری کے شعبوں میں تعلقات مزید استوار کرنے کے عزم کا اعادہ کیا۔ انہوں نے خطے میں کشیدگی کم کرنے اور تنازعات کے پرامن حل کے لیے عراقی حکومت کی سفارتی کوششوں اور مذاکراتی عمل کی مکمل حمایت کا اعلان کیا۔