ایران نے 40 روزہ جنگ کے بعد اسلحہ خانہ جدید ہتھیاروں سے مضبوط بنا لیا، پاسدارانِ انقلاب

ایران کی اسلامی انقلابی گارڈز کور (IRGC) کے ترجمان بریگیڈیئر جنرل حسین محیبی نے دعویٰ کیا ہے کہ ایران نے حالیہ کشیدگی اور 40 روزہ جنگ کے تجربات کے بعد اپنے عسکری اسلحہ خانے کو جدید ترین ہتھیاروں سے مزید مضبوط کر لیا ہے اور ملکی دفاعی صلاحیتوں میں نمایاں پیش رفت ہوئی ہے۔

ایرانی ترجمان کے مطابق، ماضی میں امریکی اور اسرائیلی فضائی حملوں کے جواب میں ایران نے اپنے زیادہ تر روایتی اور پرانے ہتھیار استعمال کیے تھے، تاہم اب حالات بالکل مختلف ہیں۔ انہوں نے انتباہ کیا کہ اگر ایران پر دوبارہ کسی بھی قسم کی جارحیت کی گئی تو مخالفین کو پہلے سے کہیں زیادہ سخت اور ہولناک نتائج کا سامنا کرنا پڑے گا۔

حسین محیبی نے تہران کے خلاف نئی ممکنہ امریکی جنگ کو غیر دانشمندانہ اقدام قرار دیتے ہوئے کہا کہ حملے کے امکان کو مکمل طور پر رد نہیں کیا جا سکتا، تاہم ایرانی مسلح افواج ہر طرح کی عسکری کارروائی کا منہ توڑ جواب دینے کے لیے پوری طرح تیار ہیں۔ انہوں نے مزید کہا کہ موجودہ امریکی انتظامیہ کو اپنے ملک میں وسط مدتی انتخابات سے قبل سیاسی برتری اور کامیابی دکھانے کی مجبوری پیش آ سکتی ہے، جس کے تحت وہ خطے میں محاذ آرائی کا راستہ اختیار کر سکتے ہیں۔