پی ٹی آئی نے جسٹس طارق محمود جہانگیری کو نااہل قرار دینے کے فیصلے کو تشویشناک قرار دے دیا

اسلام آباد: پاکستان تحریکِ انصاف (پی ٹی آئی) نے اسلام آباد ہائی کورٹ کی جانب سے جسٹس طارق محمود جہانگیری کو نااہل قرار دینے کے فیصلے پر شدید تشویش کا اظہار کرتے ہوئے اسے آئین سے انحراف قرار دیا ہے۔

پی ٹی آئی کے مطابق ججز کے احتساب کا واحد آئینی فورم سپریم جوڈیشل کونسل ہے اور اس فورم کو نظرانداز کرنا ایک خطرناک نظیر قائم کرنے کے مترادف ہے۔ پارٹی کا کہنا ہے کہ سپریم جوڈیشل کونسل کے دائرہ اختیار کو بائی پاس کرنا نہ صرف آئینی اصولوں کے خلاف ہے بلکہ عدالتی نظام کے استحکام کے لیے بھی نقصان دہ ہو سکتا ہے۔

پی ٹی آئی نے مؤقف اختیار کیا کہ کسی بھی جج کو حقِ سماعت اور منصفانہ ٹرائل کے بغیر نااہل قرار دینا انصاف کے بنیادی تقاضوں کے منافی ہے، جو دراصل انصاف کے قتل کے مترادف ہے۔ پارٹی رہنماؤں کا کہنا ہے کہ آج ایک جج کو نشانہ بنایا گیا ہے، کل دیگر ججز بھی اسی طرح کے فیصلوں کی زد میں آ سکتے ہیں۔

بیان میں مزید کہا گیا کہ اسلام آباد ہائی کورٹ کے اس فیصلے کے دور رس اثرات ہوں گے اور اس سے عدلیہ کی آزادی پر سنگین سوالات کھڑے ہو گئے ہیں۔ پی ٹی آئی نے زور دیا کہ آئین اور قانون کی بالادستی کو یقینی بنانے کے لیے عدالتی احتساب کے طے شدہ آئینی طریقہ کار پر ہی عمل ہونا چاہیے۔