آبنائے ہرمز میں 2500 سے زائد کنٹینرز لیجانے والا بحری جہاز ڈوب گیا

علاقائی تناؤ اور سمندری سیکیورٹی کے شدید بحران کے دوران آبنائے ہرمز میں 2500 سے زائد کنٹینرز لے جانے والا ایک بڑا تجارتی بحری جہاز ڈوب گیا ہے۔

ایرانی بحریہ کے مطابق، مذکورہ کنٹینر بردار جہاز سمندر میں ایک بارودی سرنگ (Naval Mine) سے ٹکرایا، جس کے نتیجے میں زوردار دھماکا ہوا اور جہاز میں شدید آگ بھڑک اٹھی جو بالآخر اس کے ڈوبنے کا سبب بنی۔ بتایا گیا ہے کہ یہ تجارتی جہاز آبنائے ہرمز میں ایک انتہائی خطرناک اور غیر معائنہ شدہ بحری راستے سے گزرنے کی کوشش کر رہا تھا۔

واضح رہے کہ برطانوی میری ٹائم ٹریڈ آپریشنز (UKMTO) نے بھی رپورٹ کیا تھا کہ آبنائے ہرمز میں داخل ہونے والے 50 ہزار ٹن وزنی کنٹینر جہاز اور وہاں سے نکلنے والے 19 ہزار ٹن وزنی ایک اور تجارتی جہاز کو نامعلوم پروجیکٹائلز کے ذریعے نشانہ بنایا گیا تھا۔ ‘رائٹرز’ کے مطابق ایران نے سمندری حدود میں امریکی بحری جہازوں کی نگرانی کے لیے چھوٹی کشتیوں کا استعمال شروع کیا ہے، جبکہ تجزیہ کاروں کے مطابق ان تمام حملوں اور سمندری سیکیورٹی میں عدم استحکام کا مقصد عالمی مارکیٹ میں خام تیل کی قیمتوں کو کنٹرول کرنا ہے۔