شرجیل میمن کا پاک فوج کے تربیتی طیارے کو حادثے پر گہرے دکھ اور افسوس کا اظہار

سینئر صوبائی وزیر شرجیل انعام میمن نے بلوچستان کے دارالحکومت کوئٹہ کے قریب پاک فوج کے تربیتی طیارے کو پیش آنے والے دلخروش حادثے پر گہرے دکھ اور شدید افسوس کا اظہار کیا ہے۔

اپنے تعزیتی بیان میں شرجیل انعام میمن نے حادثے میں انسٹرکٹر پائلٹ میجر حسنین شہزاد ہمایوں اور سٹوڈنٹ پائلٹ کیپٹن عبدالصمد کی شہادت پر شہدا کے درجات کی بلندی کے لیے دعا کی اور ان کے غمزدہ خاندانوں سے دلی تعزیت کا اظہار کیا۔ انہوں نے کہا کہ میجر حسنین شہزاد ہمایوں اور کیپٹن عبدالصمد کی ناگہانی شہادت پر نہ صرف ان کے لواحقین بلکہ پوری قوم انتہائی افسردہ اور غمزدہ ہے۔

سینئر وزیر نے پاک فوج کے شہدا کی قربانیوں کو خراجِ عقیدت پیش کرتے ہوئے کہا کہ وطنِ عزیز کے دفاع اور فرائض کی انجام دہی کے دوران جانوں کا نذرانہ پیش کرنے والے پاک افواج کے جوان قوم کا فخر ہیں۔ انہوں نے کہا کہ اس مشکل اور آزمائش کی گھڑی میں پوری قوم شہدا کے سوگوار خاندانوں کے دکھ اور غم میں برابر کی شریک ہے۔ انہوں نے دعا کی کہ اللہ تعالیٰ شہدا کے درجات بلند فرمائے اور ان کے لواحقین کو یہ ناقابلِ تلافی نقصان برداشت کرنے کا صبرِ جمیل عطا فرمائے۔