صوبے کو انتشار نہیں خدمت کی ضرورت ہے، مریم نواز کی خیبر پختونخوا حکومت پر تنقید

وزیراعلیٰ پنجاب مریم نواز شریف نے کہا ہے کہ خیبر پختونخوا میں موجودہ ایمرجنسی اور گورنر راج کی صورتحال عوام کا نہیں بلکہ پی ٹی آئی کی 13 سالہ نااہلی، بدامنی اور انتشار کی سیاست کا نتیجہ ہے۔ سماجی رابطے کی ویب سائٹ ایکس (X) پر جاری کردہ اپنے ایک تفصیلی بیان میں مریم نواز نے پنجاب اور خیبر پختونخوا کی پیش رفت کا موازنہ کرتے ہوئے کہا کہ دونوں صوبے ایک ہی آئین اور قومی خزانے کا حصہ ہیں، لیکن فرق صرف نیت اور اہلیت کا ہے۔ انہوں نے سوال اٹھایا کہ اگر پنجاب میں صفائی، اسکالرشپ، گرین الیکٹرک بسیں، پختہ سڑکیں اور مفت ادویات کی سہولیات مل سکتی ہیں تو خیبر پختونخوا میں کیوں نہیں؟ وزیراعلیٰ پنجاب کا کہنا تھا کہ پچھلے 13 برسوں کے دوران کے پی کے عوام کو صرف دھرنے، گالم گلوچ اور سستے ٹرینڈز دیے گئے اور عوامی صحت و حفاظت کے بجائے توجہ اسلام آباد پر چڑھائی پر رکھی گئی۔ انہوں نے زور دیا کہ حکومتیں بڑھکوں سے نہیں بلکہ کام سے چلتی ہیں اور کے پی کو اب انتشار نہیں بلکہ واقعی خدمت کی ضرورت ہے۔