اسلام آباد میں ریڈ الرٹ جاری، پولیس کی بھاری نفری تعینات

خیبر پختونخوا میں پیدا شدہ بحرانی صورت حال کے تناظر میں ملک گیر سیکیورٹی اور وفاقی دارالحکومت میں امن و امان کی فضا برقرار رکھنے کے لیے اسلام آباد میں پولیس کی اضافی نفری تعینات کرتے ہوئے ‘ریڈ الرٹ’ جاری کر دیا گیا ہے۔ ذرائع کے مطابق انتظامیہ نے سیکیورٹی خطرات سے نمٹنے کے لیے دارالحکومت کے تمام اہم چوک چوراہوں اور حساس مقامات پر بھاری نفل رائفلز اور انٹی فساد فورس کے اہلکار تعینات کر دیے ہیں۔

شہر کے تمام داخلی اور خارجی راستوں کی ناکہ بندی کر کے چیکنگ سخت کر دی گئی ہے جبکہ ریڈ زون کی سیکیورٹی انتہائی سخت کرتے ہوئے عام اور غیر متعلقہ افراد کا داخلہ مکمل طور پر بند کر دیا گیا ہے۔ سرکاری و حساس عمارتوں کی حفاظت کے لیے پولیس کے ہمراہ رینجرز کے دستے بھی الرٹ کر دیے گئے ہیں۔

ذرائع کے مطابق اسلام آباد پولیس کے تمام ایس پیز، ڈی ایس پیز اور ایس ایچ اوز کو خود فیلڈ میں رہنے اور صورتحال کی لمحہ بہ لمحہ نگرانی کرنے کی سخت ہدایت کی گئی ہے۔ انتظامیہ نے واضح حکم جاری کیا ہے کہ شہر میں کہیں بھی احتجاجی بینرز، مشکوک نقل و حرکت یا غیر قانونی ہجوم نظر آنے پر فوراً ایکشن لیا جائے جبکہ دفعہ 144 کی ورزی کرنے والے کسی بھی شخص کو بلا تاخیر گرفتار کر کے قانونی کارروائی عمل میں لائی جائے۔