مچھ میں ٹرک اور وین میں خوفناک تصادم، 7 افراد جاں بحق، 30 سے زائد زخمی

بلوچستان کے علاقے مچھ میں زمیندار ہوٹل کے قریب ایک بے قابو ٹرک اور وین کے درمیان بھیانک تصادم کے نتیجے میں 7 افراد موقع پر جاں بحق جبکہ 30 سے زائد شدید زخمی ہو گئے ہیں۔ پولیس حکام کے مطابق حادثہ ٹرک کے بریک فیل ہونے کے باعث پیش آیا، جس کے نتیجے میں شدید تصادم کے بعد دونوں گاڑیاں گہری کھائی میں جا گریں۔ واقعے کے فوراً بعد مقامی انتظامیہ اور امدادی ٹیموں نے موقع پر پہنچ کر ریسکیو آپریشن شروع کر دیا، تاہم پہاڑی علاقہ ہونے کے باعث زخمیوں کو کوئٹہ کے بڑے اسپتالوں میں منتقل کرنے میں شدید دشواری کا سامنا ہے۔ پولیس کے مطابق لاشوں اور زخمیوں کو نکال کر طبی امداد کے لیے منتقل کیا جا رہا ہے جبکہ واقعے کی مزید تحقیقات جاری ہیں۔