خیبرپختونخوا ایڈوائزری کونسل کا پہلا اجلاس، عوام کو دہشتگردی نے نجات دلائیں گے: گورنر

خیبر پختونخوا میں ایمرجنسی کے نفاذ اور وفاقی حکمنامے کے بعد گورنر فیصل کریم کنڈی کی سربراہی میں 11 رکنی ایڈوائزری کونسل کا پہلا باضابطہ اجلاس منعقد ہوا، جس میں صوبے کو درپیش انتظامی و سیکیورٹی چیلنجز، امن و امان کی بحالی اور کرپشن کے خاتمے کے لیے اہم فیصلے کیے گئے۔ اجلاس کے شرکا سے خطاب کرتے ہوئے گورنر خیبر پختونخوا نے کہا کہ امن کا قیام اور شہریوں کی جان و مال کا تحفظ کونسل کی اولین ترجیح ہے، جس کے لیے خیبر پختونخوا پولیس اور کاؤنٹر ٹیررازم ڈیپارٹمنٹ (سی ٹی ڈی) کی عملی استعداد کار میں فوراً اضافہ کیا جائے گا۔ انہوں نے انتظامی امور میں کرپشن کے خلاف زیرو ٹالرنس پالیسی پر زور دیتے ہوئے کہا کہ صوبے کو قدرتی وسائل اور سیاحت کے فروغ سے معاشی طور پر مستحکم بنایا جائے گا۔ گورنر کے پی نے کونسل کے تمام ارکان کو محنت اور لگن سے کام کرنے کی ہدایت کرتے ہوئے اعادہ کیا کہ تمام متعلقہ فریقین مل کر صوبے کو بحران سے نکالیں گے۔