خیبر پختونخوا میں ایمرجنسی اور گورنر راج مسائل کا حل نہیں، جمہوریت دشمنی کا سفر جاری ہے: حافظ نعیم الرحمان

امیر جماعت اسلامی حافظ نعیم الرحمان نے خیبر پختونخوا میں ایمرجنسی اور گورنر راج کے نفاذ کی سخت مخالفت کرتے ہوئے اس اقدام کو مسائل کا حل ماننے سے انکار کر دیا ہے۔ سماجی رابطے کی سائٹ ‘ایکس’ پر اپنے ایک جاری کردہ بیان میں حافظ نعیم الرحمان نے کہا کہ جب اقتدار پر فائز قوتیں غیر معمولی آئینی اقدامات اور گورنر راج کے ذریعے حکومت چلانے کی کوشش کریں تو اس کا صاف مطلب ہے کہ ان کی حکومت کا چراغ بجھنے والا ہے۔ انہوں نے مسلم لیگ (ن) اور پیپلز پارٹی کو نشانہ بناتے ہوئے کہا کہ پی ڈی ایم کی جماعتوں نے رجیم چینج کے وقت سے جو تماشا شروع کیا تھا، جمہوریت دشمنی کا وہ سفر آج بھی بلا تعطل جاری ہے۔ امیر جماعت اسلامی نے مزید کہا کہ ن لیگ اور پیپلز پارٹی کی تاریخ عوامی مینڈینٹ تسلیم نہ کرنے اور گورنر راج مسلط کرنے سے بھری پڑی ہے، جس سے یہ بات روزِ روشن کی طرح عیاں ہو چکی ہے کہ ‘فارم 47’ کے ذریعے مسلط کردہ یہ پورا نظام مکمل طور پر ناکام ہو چکا ہے۔