گورنر خیبرپختونخوا کی صدر مملکت سے ملاقات، صوبے کی سکیورٹی صورتحال پر بریفنگ

صدر مملکت آصف علی زرداری سے ایوانِ صدر میں گورنر خیبرپختونخوا فیصل کریم کنڈی اور وفاقی وزیر داخلہ محسن نقوی نے ایک اہم اعلیٰ سطحی ملاقات کی۔ ملاقات کے دوران صدر مملکت کو صوبہ خیبر پختونخوا میں بدامنی کی بڑھتی ہوئی صورتِ حال، سیکیورٹی کے چیلنجز اور حالیہ سیاسی کشیدگی کے باعث پیدا ہونے والے امن و امان کے مسائل پر تفصیلی بریفنگ دی گئی۔ اس موقع پر صوبے میں امن کی بحالی، شہریوں کے تحفظ اور آئینی و قانونی اختیارات کے ممکنہ استعمال سے متعلق امور پر بھی طویل مشاورت کی گئی۔

ملاقات کے بعد میڈیا نمائندگان سے غیر رسمی گفتگو کرتے ہوئے وفاقی وزیر داخلہ محسن نقوی نے صوبے میں پیدا ہونے والے بحران کی سنگینی کا اشارہ دیتے ہوئے کہا کہ خیبرپختونخوا میں موجودہ حالات کے تناظر میں ایمرجنسی یا گورنر راج نافذ نہ کرنے کی اب مزید کوئی گنجائش باقی نہیں بچی۔ انہوں نے وضاحت کی کہ وفاقی حکومت نے آخری حد تک اس انتہائی اقدام سے بچنے اور معاملے کو افہام و تفہیم سے حل کرنے کی بھرپور کوشش کی۔ محسن نقوی نے سیاسی و اپوزیشن رہنماؤں کا حوالہ دیتے ہوئے چیلنج کیا کہ “آپ مولانا فضل الرحمان اور بیرسٹر گوہر سے پوچھیں کہ میں نے اس بحران کو ٹالنے کے لیے کتنی تگ و دو کی، انہوں نے خود دیکھا کہ حکومت نے کس حد تک لچک کا مظاہرہ کیا”، تاہم اب حالات اس نقطے پر پہنچ چکے ہیں جہاں آئینی اقدامات ناگزیر ہو چکے ہیں۔