انسدادِ دہشت گردی عدالت اسلام آباد کی وزیرِ اعلیٰ کے پی و دیگر کے خلاف اشتہاری کارروائی

انسدادِ دہشت گردی عدالت اسلام آباد نے وزیرِ اعلیٰ خیبر پختونخوا سہیل آفریدی اور دیگر ملزمان کے خلاف اشتہاری کارروائی شروع کر دی ہے۔ عدالت کے احکامات کی روشنی میں مختلف مقامات پر طلبی کے نوٹسز چسپاں کر دیے گئے ہیں۔

عدالتی ذرائع کے مطابق جوڈیشل کمپلیکس اسلام آباد میں بھی مختلف مقامات پر ملزمان کی طلبی سے متعلق نوٹسز آویزاں کیے گئے ہیں۔ نوٹسز میں سہیل آفریدی، مینا خان، امجد خان، شفیع اللہ جان اور امجد آفریدی کو عدالت میں پیش ہونے کی ہدایت کی گئی ہے۔

یہ کارروائی انسدادِ دہشت گردی عدالت کے سیکشن 87 کے حکمنامے کے تحت عمل میں لائی گئی ہے۔ نوٹسز کے متن میں کہا گیا ہے کہ ملزمان عدالتی احکامات کی تعمیل نہیں کر رہے یا روپوش ہیں، لہٰذا انہیں فوری طور پر عدالت میں پیش ہونے کا حکم دیا جاتا ہے۔

عدالت کی جانب سے واضح کیا گیا ہے کہ ملزمان کو پیشی کے لیے یہ آخری موقع دیا جا رہا ہے۔ اگر سیکشن 87 کی کارروائی کے دوران بھی ملزمان عدالت میں پیش نہ ہوئے تو ان کے خلاف مزید سخت قانونی کارروائی عمل میں لائی جائے گی۔