وزیراعظم کی ذیابیطس کی روک تھام کے لیے جامع حکمتِ عملی مرتب کرنے کی ہدایت

وزیراعظم محمد شہباز شریف نے ذیابیطس کی روک تھام اور اس سے بچاؤ کے لیے ایک جامع اور مؤثر قومی حکمتِ عملی مرتب کرنے کی ہدایت کی ہے۔ قومی و بین الاقوامی طبی ماہرین کے وفد سے ملاقات کے دوران گفتگو کرتے ہوئے وزیراعظم نے کہا کہ بڑھتے ہوئے طبی چیلنجز سے نمٹنے کے لیے علاج کے ساتھ احتیاط اور صحت مند طرزِ زندگی کا فروغ وقت کی اہم ضرورت ہے۔ انہوں نے نوجوانوں بالخصوص اسکول و کالج کے طلبہ میں باقاعدہ جسمانی سرگرمی اور متوازن غذا کی اہمیت پر زور دیا اور ہدایات جاری کیں کہ میڈیا اور ڈیجیٹل پلیٹ فارمز کے ذریعے آگاہی مہمات چلائی جائیں۔ وزیراعظم نے ذیابیطس کی روک تھام کے لیے عالمی تجربات اور تحقیق سے استفادہ کرنے پر بھی زور دیا، جبکہ اینڈوکرائنولوجی سیمینار میں آئے ماہرینِ طب نے پاکستان کے اقدمات کو سراہتے ہوئے آگاہی مہمات میں مکمل تعاون کا اعادہ کیا۔