گورنر راج یا ایمرجنسی؟ وزیراعظم نے خیبرپختونخوا کے متعلق اہم اجلاس طلب کرلیا

وزیراعظم شہباز شریف نے خیبرپختونخوا کی سکیورٹی صورتحال پر وزیراعظم ہاؤس میں اعلیٰ سطح کا اہم اجلاس طلب کر لیا ہے، جس میں صوبے میں ایمرجنسی یا گورنر راج کے نفاذ جیسے اہم آئینی آپشنز پر فیصلے کا امکان ہے۔ ذرائع کے مطابق اجلاس میں اہم وفاقی وزراء اور وزارتِ داخلہ و قومی سلامتی کے اعلیٰ حکام شرکت کریں گے، جو صوبے کی امن و امان کی صورتحال اور ضم شدہ اضلاع سمیت 12 حساس اضلاع پر بریفنگ دیں گے۔ اجلاس میں آئین کے آرٹیکل 232 سے 234 کے تحت اہم اختیارات وفاقی حکومت کے سپرد کرنے کی تجاویز کا بھی جائزہ لیا جائے گا، جبکہ ایمرجنسی کے حتمی نفاذ کے لیے وزیراعظم بعد ازاں وفاقی کابینہ کا اجلاس طلب کر کے منظوری لیں گے۔