روس سے ڈیزل خریدنے کا معاہدہ جنگ لمبی کرنے کیلئے سرمایہ کاری ہے، زیلنسکی

یوکرینی صدر ولادیمیر زیلنسکی نے امریکی اور عالمی مارکیٹ کو روس سے ڈیزل کی خرید و فروخت پر شدید تنقید کرتے ہوئے کہا ہے کہ ماسکو سے تیل کی مصنوعات خریدنا جنگ کے خاتمے کے بجائے اسے مزید طول دینے میں سرمایہ کاری ہے۔ اپنے بیان میں زیلنسکی نے واضح کیا کہ ولادیمیر پیوٹن کو معاشی ریلیف اور تحفے دینے سے امن قائم نہیں ہو سکتا، بلکہ روس کو پیٹرولیم مصنوعات فروخت کرنے کی اجازت دینے سے اسے جنگ جاری رکھنے کے لیے اضافی فنڈز ملیں گے۔ انہوں نے روس پر پابندیاں نرم کرنے کو واضح کمزوری قرار دیتے ہوئے امریکا پر زور دیا کہ وہ پابندیوں میں نرمی سے قبل روس پر دباؤ ڈال کر باہمی بنیادوں پر کشیدگی میں واضح اور پائیدار کمی کا معاہدہ کرائے اور یوکرین کے دفاع کے لیے اپنی مضبوط حمایت جاری رکھے۔