راولپنڈی: اے آئی سے قابل اعتراض تصاویر بنانے والا ملزم گرفتار

نیشنل سائبر کرائم انویسٹی گیشن ایجنسی (این سی سی آئی اے) راولپنڈی نے ایک کارروائی کے دوران آرٹیفیشل انٹیلی جنس (اے آئی) کی مدد سے خاتون کی قابلِ اعتراض تصاویر اور ویڈیوز بنانے اور انہیں سوشل میڈیا پر پھیلانے والے ملزم کو گرفتار کر لیا ہے۔ ترجمان کے مطابق متاثرہ خاتون کی شکایت پر کارروائی کرتے ہوئے ملزم نیئر شمران اقبال بھٹی کو حراست میں لیا گیا، جو جعلی اکاؤنٹس کے ذریعے اے آئی سے تیار کردہ مواد شیئر کر رہا تھا۔ ملزم کو جدید فرانزک تفتیش اور میٹا ریکارڈز کے تجزیے کی مدد سے ٹریس کیا گیا اور اس کے موبائل فونز اور ڈیجیٹل شواہد کا تجزیہ مکمل کر کے مقدمہ درج کر لیا گیا ہے۔ ڈائریکٹر جنرل این سی سی آئی اے سید علی ناصر رضوی نے اس عزم کا اعادہ کیا ہے کہ شہریوں کی رازداری اور عزت نفس کا تحفظ ایجنسی کی اولین ترجیح ہے۔