دہشت گردی کے خلاف ہر قربانی دینے کو تیار ہیں: وزیراعلیٰ بلوچستان

وزیراعلیٰ بلوچستان میر سرفراز بگٹی نے صوبے میں امن و امان کے قیام اور انسدادِ دہشت گردی کے حوالے سے صوبائی حکومت کے عزم کو دہراتے ہوئے کہا ہے کہ بلوچستان کی سیکیورٹی، خودمختاری اور شہریوں کی حفاظت کے لیے ہر ممکن قربانی دینے کو تیار ہیں۔ کوئٹہ میں میڈیا سے گفتگو کرتے ہوئے انہوں نے خیبر پختونخوا کی سیاسی صورتِ حال پر تنقید کی اور کہا کہ ایک صوبے کا وزیراعلیٰ لوگوں کو وفاقی دارالحکومت پر چڑھائی اور احتجاج کے لیے اکٹھا کر رہا ہے، جبکہ انہیں چاہیے کہ وہ عوامی فلاح اور ثقافتی میلے (Festival) کے انعقاد کے لیے لوگوں کو مجتمع کریں۔

سرفراز بگٹی نے واضح کیا کہ خیبر پختونخوا اور بلوچستان کی قیادت کے انداز میں بنیادی فرق ہے؛ ایک طرف احتجاج اور چڑھا ئی کی سیاست ہو رہی ہے جبکہ دوسری طرف بلوچستان حکومت نوجوانوں کو کھیلوں کے میدان اور مثبت سرگرمیاں فراہم کر رہی ہے۔ انہوں نے اس بات پر زور دیا کہ بلوچستان کا مستقبل مکمل طور پر پاکستان سے وابستہ ہے۔ وزیراعلیٰ نے بلوچ قوم پر زور دیا کہ ایک منظم اور گہری سازش کے تحت بلوچ نوجوانوں کو ایک لاحاصل اور تباہ کن عسکری جنگ کی طرف دھکیلا جا رہا ہے، جسے ہر صورت ناکام بنایا جائے گا۔