مکہ معاہدہ خطے میں استحکام کی ضمانت، سعودی عرب کا دفاع کیا جائے گا: ترجمان پاک فوج

افواجِ پاکستان کے ترجمان اور ڈی جی آئی ایس پی آر لیفٹیننٹ جنرل احمد شریف چودھری نے امریکی نشریاتی ادارے سی این این کو انٹرویو دیتے ہوئے واضح کیا ہے کہ مکہ مشترکہ دفاعی معاہدے کا ایک بنیادی مقصد سعودی عرب کا دفاع کرنا ہے اور اس کا دفاع ہر صورت کیا جائے گا۔ انہوں نے بتایا کہ یہ معاہدہ کوئی اچانک وجود میں آنے والا اتحاد نہیں ہے بلکہ پاکستانی افواج مختلف شعبوں میں دہائیوں سے سعودی عرب میں موجود ہیں۔ ڈی جی آئی ایس پی آر نے کہا کہ اس معاہدے کے نفاذ اور عملی کارروائی کے اثرات خالصتاً دفاعی نوعیت کے ہوں گے، جس کا فیصلہ آپریشنل کمانڈرز کریں گے۔ انہوں نے مزید کہا کہ پاکستان نے امریکا اور ایران کے درمیان تنازعے کے خاتمے اور جنگ بندی کے لیے ہمیشہ ایک غیر جانبدار اور دیانت دار ثالث کا کردار ادا کیا ہے، اور ہمارا بنیادی مفاد علاقائی امن و استحکام سے جڑا ہوا ہے۔