بانی پی ٹی آئی کی بہنوں کو جیل میں سہولیات بارے رپورٹ طلب

لاہور ہائیکورٹ نے بانی پاکستان تحریک انصاف کی بہنوں کی نظر بندی اور جیل میں بنیادی سہولیات کی فراہمی سے متعلق درخواستوں پر سماعت کرتے ہوئے علیمہ خان کی نظر بندی کی درخواست نمٹا دی ہے۔ جسٹس عبہر گل خان نے نورین نیازی اور عظمیٰ خان کو جیل میں بنیادی سہولیات فراہم کرنے سے متعلق 12 اکتوبر تک رپورٹ طلب کر لی ہے۔ دورانِ سماعت سرکاری وکیل نے علیمہ خان کی نظر بندی سے متعلق رپورٹ پیش کی جس پر عدالت نے یہ درخواست نمٹا دی۔ عدالت نے جیل میں ادویات اور کپڑوں کی فراہمی سے متعلق فہرست طلب کی جبکہ کھانے پینے کی اشیا کی اجازت دینے سے انکار کر دیا۔ اس موقع پر عدالت نے ہدایت کی کہ جو بھی چیزیں درکار ہوں انہیں باقاعدہ لکھ کر دیا جائے تاکہ ان کیمپس کے مطابق عملدرآمد یقینی بنایا جا سکے۔