پاکستان اور ویٹیکن کا بین المذاہب ہم آہنگی اور پُرامن بقائے باہمی کے فروغ پر اتفاق

پاکستان اور ویٹیکن نے بین المذاہب ہم آہنگی، باہمی احترام اور پُرامن بقائے باہمی کے فروغ کے ساتھ ساتھ دوطرفہ سفارتی تعلقات کو مزید مستحکم بنانے کے عزم کا اعادہ کیا ہے۔ نائب وزیراعظم و وزیر خارجہ سینیٹر اسحاق ڈار اور ہولی سی کے سیکرٹری برائے تعلقاتِ ریاست آرچ بشپ پال رچرڈ گلاگر کے درمیان ہونے والی ملاقات میں دوطرفہ تعلقات کے قیام کی 75 ویں سالگرہ کے سلسلے میں تبادلہ خیال کیا گیا۔ اسحاق ڈار نے امن کے فروغ میں ہولی سی کے کردار اور کیتھولک برادری کی تعلیمی و طبی خدمات کو سراہا، جبکہ آرچ بشپ نے علاقائی امن کے لیے پاکستان کے تعمیری کردار کی تعریف کی۔ ملاقات کے دوران مسئلہ فلسطین، خطے کے انسانی بحران اور عالمی امن کے قیام کے لیے مشترکہ کوششوں کی ضرورت پر بھی زور دیا گیا۔