ایران یورینیم افزودگی کا عمل ترک نہیں کرے گا، سربراہ ایرانی جوہری توانائی تنظیم

ایرانی جوہری توانائی تنظیم (AEOI) کے سربراہ محمد اسلامی نے اعلان کیا ہے کہ ایران یورینیم کی افزودگی کا عمل کسی صورت ترک نہیں کرے گا اور نہ ہی اپنا تیار کردہ افزودہ یورینیم کسی دوسرے ملک کے حوالے کرے گا۔ انہوں نے واضح کیا کہ تہران اپنے جوہری حقوق پر کوئی سمجھوتہ نہیں کرے گا اور امریکہ و اس کے اتحادیوں کی جانب سے دی جانے والی دھمکیوں کے باوجود اپنے طے شدہ موقف پر سختی سے قائم رہے گا۔

محمد اسلامی نے ذرائع ابلاغ سے گفتگو کرتے ہوئے کہا کہ ایرانی جوہری تنصیبات کے خلاف امریکہ کی جانب سے ملنے والی دھمکیاں کوئی نئی بات نہیں ہیں اور نہ ہی ان سے تہران کے ارادے متزلزل کیے جا سکتے ہیں۔ انہوں نے زور دے کر کہا کہ یورینیم افزودگی ہر عالمی جوہری پروگرام کا بنیادی و لازمی حصہ ہے، ایران اس تکنیکی عمل کو قانون کے مطابق جاری رکھنے کا پورا ارادہ رکھتا ہے اور اس سلسلے میں کسی غیر ملکی دباؤ کے سامنے سرِ تسلیم خم نہیں کرے گا۔