ای میل کے ذریعے مذاق میں طلاق دینا مہنگا پڑ گیا، لاہور ہائیکورٹ نے شوہر کا مؤقف مسترد کر دیا

لاہور ہائیکورٹ نے طلاق سے متعلق ایک انتہائی اہم اور تاریخی قانونی اصول طے کرتے ہوئے قرار دیا ہے کہ شوہر کی جانب سے ای میل پر دی گئی طلاق کو “مذاق” قرار دینے کے موقف کو مسترد کر دیا گیا ہے۔ ہائیکورٹ کے جسٹس انوار حسین نے راحیل احمد نامی شوہر کی درخواست پر 13 صفحات پر مشتمل تفصیلی فیصلہ جاری کرتے ہوئے یونین کونسل کی جانب سے طلاق مؤثر ہونے کا جاری کردہ سرٹیفکیٹ بحال رکھا۔ عدالت نے فیصلے کی نقل پنجاب کی تمام فیملی کورٹس کو رہنمائی کے لیے بھجوانے کا حکم بھی جاری کیا ہے۔

عدالتی فیصلے کے مطابق اگر شوہر ای میل یا دیگر ذرائع سے طلاق دینے کے بعد یونین کونسل کو آگاہ نہیں کرتا، تو متاثرہ خاتون خود یونین کونسل سے رجوع کر کے قانونی کارروائی شروع کروا سکتی ہے۔ عدالت نے واضح کیا کہ شوہر اپنے تاخیری حربوں اور قانونی غلطی کا فائدہ اٹھا کر عورت کو ازدواجی حیثیت کی غیر یقینی صورتحال میں نہیں رکھ سکتا۔ لاہور ہائیکورٹ نے حکومتِ پنجاب کو طلاق کے قوانین میں اصلاحات و ترمیم کی سفارش بھی کی تاکہ خواتین کو غیر ضروری پیچیدگیوں سے بچایا جا سکے۔