شہباز شریف سے بحرینی وزیر خارجہ کی ملاقات، دوطرفہ تعاون بڑھانے پر اتفاق

بحرین کے وزیرِ خارجہ ڈاکٹر عبداللطیف بن راشد الزیانی نے اسلام آباد میں وزیراعظم محمد شہباز شریف سے ایک اہم ملاقات کی۔ بحرینی وزیرِ خارجہ پاکستان اور بحرین کے مابین مشترکہ وزارتی کمیشن (JMC) کے تیسرے اجلاس کی مشترکہ صدارت کے لیے پاکستان کے دورے پر ہیں۔ وزیراعظم شہباز شریف نے معزز مہمان کا پرخلوص خیرمقدم کرتے ہوئے بحرین کی اعلیٰ قیادت اور عوام کے لیے نیک تمناؤں کا اظہار کیا اور دونوں ممالک کے دیرینہ برادرانہ تعلقات کو باہمی اعتماد، مشترکہ اقدار اور مضبوط عوامی روابط کا عکاس قرار دیا۔

ملاقات کے دوران دونوں رہنماؤں نے تجارت، سرمایہ کاری، توانائی، انفارمیشن ٹیکنالوجی اور افرادی قوت کی برآمد جیسے اہم شعبوں میں دوطرفہ تعاون کو مزید مستحکم کرنے کی عزم کا اعادہ کیا۔ بحرینی وزیرِ خارجہ نے خطے میں امن و استحکام اور تنازعات کے حل کے لیے پاکستان کے تعمیری و ثالثانہ کردار کی تعریف کی۔ دونوں جانب سے علاقائی و عالمی سیکیورٹی کی صورتحال پر تبادلہ خیال کیا گیا اور اس بات پر اتفاق کیا گیا کہ مشترکہ وزارتی کمیشن کا یہ اجلاس دونوں ممالک کے معاشی و سفارتی تعلقات میں ایک نیا باب ثابت ہوگا۔