یورپی بینک کراچی میں سیوریج اور گندے پانی کی صفائی کیلئے 20 ارب روپے فراہم کرے گا

یورپین انویسٹمنٹ بینک اور پاکستان کے درمیان کراچی میں سیوریج اور گندے پانی کی صفائی کے منصوبوں کیلئے 60 ملین یورو (تقریباً 20 ارب روپے) کی مالی معاونت سے متعلق ابتدائی معاہدے پر دستخط ہو گئے ہیں۔ معاہدے کی تقریب یورپی یونین کے دارالحکومت برسلز میں منعقد ہونے والے 15ویں پاکستان۔ای یو مشترکہ کمیشن کے اجلاس کے موقع پر ہوئی۔

اعلامیے کے مطابق اس معاہدے کے تحت یورپین انویسٹمنٹ بینک کی مالی معاونت سے کراچی میں پانی کی صفائی کے اہم مراکز کی بحالی اور نئے ٹریٹمنٹ انفراسٹرکچر کی تعمیر کی جائے گی، جس سے شہر میں صاف پانی کی دستیابی میں نمایاں بہتری آئے گی۔ حکام کا کہنا ہے کہ اس منصوبے کے نتیجے میں کراچی کی تیزی سے بڑھتی ہوئی آبادی کیلئے آبی تحفظ کو مضبوط بنایا جا سکے گا اور سیوریج کے پانی سے پیدا ہونے والے ماحولیاتی مسائل میں بھی کمی آئے گی۔