جکارتا میں پاکسان کی آئی ٹی انڈسٹری کا ڈنکا: “ایشین اوسیانین ایوارڈز” میں 11 عالمی اعزازات اپنے نام کر لیے

جکارتا، انڈونیشیا میں منعقدہ “ایشین اوسیانین کمپیوٹنگ انڈسٹری آرگنائزیشن” (ASOCIO) ڈیجیٹل اینڈ اے آئی ایوارڈز 2026 میں پاکستان کی انفارمیشن ٹیکنالوجی اور آرٹیفیشل انٹیلی جنس انڈسٹری نے شاندار کامیابی حاصل کرتے ہوئے 11 مختلف کیٹیگریز میں عالمی اعزازات اپنے نام کر لیے ہیں۔ پاکستان سافٹ ویئر ہاؤسز ایسوسی ایشن (P@SHA) کے مطابق اس عالمی تقریب میں ایشیا اور اوسیانیا کے 26 ممالک اور معیشتوں نے شرکت کی۔ پاشا کے چیئرمین ڈاکٹر شعیب اے خان نے اس کامیابی کو ملکی آئی ٹی شعبے کے لیے ایک اہم سنگِ میل قرار دیا۔

پاکستانی اداروں اور آئی ٹی کمپنیوں کو ڈیجیٹل گورننس، ٹیلنٹ ڈیولپمنٹ، سائبر سیکیورٹی، تعلیم، صحت، زراعت، مالیاتی خدمات اور مینوفیکچرنگ میں اے آئی (AI) کے جدید استعمال پر ایوارڈز سے نوازا گیا۔ خیبر پختونخوا انفارمیشن ٹیکنالوجی بورڈ (KPITB) نے ‘ڈیجیٹل گورنمنٹ ایوارڈ’ حاصل کیا، جبکہ رمائر (REMIRE) نے ٹیلنٹ ڈیولپمنٹ اور سمیٹری گروپ نے گلوبل بزنس سروس ایوارڈ جیتا۔ دیگر نمایاں سیکیورٹی و اے آئی کمپنیوں بشمول سیکیور بینز، پلانٹ بیونڈ، ڈی ایکس ویژن اور سائبرڈ کو بھی ان کی بہترین کارکردگی پر سراہا گیا۔