فیفا ورلڈ کپ 2026 کیلئے ریکارڈ انعامی رقم کا اعلان

فٹبال کی عالمی تنظیم فیفا نے ورلڈ کپ 2026 کیلئے اب تک کی سب سے زیادہ انعامی رقم کا اعلان کر دیا ہے۔ فیفا کے اعلامیے کے مطابق ورلڈ کپ 2026 میں مجموعی طور پر 65 کروڑ 50 لاکھ ڈالرز کی انعامی رقم تقسیم کی جائے گی، جو گزشتہ ایڈیشن کے مقابلے میں نمایاں اضافہ ہے۔ 2022 کے فیفا ورلڈ کپ میں مجموعی طور پر 44 کروڑ ڈالرز کی انعامی رقم دی گئی تھی۔

اعلامیے کے مطابق ورلڈ کپ 2026 کی فاتح ٹیم کو 5 کروڑ ڈالرز کی انعامی رقم دی جائے گی، جبکہ گزشتہ ایڈیشن میں چیمپئن ٹیم کو 4 کروڑ 20 لاکھ ڈالرز ملے تھے۔ رنر اپ ٹیم کو 3 کروڑ 30 لاکھ ڈالرز، تیسرے نمبر پر آنے والی ٹیم کو 2 کروڑ 90 لاکھ ڈالرز اور چوتھی پوزیشن حاصل کرنے والی ٹیم کو 2 کروڑ 70 لاکھ ڈالرز دیے جائیں گے۔

فیفا کے مطابق پانچویں سے آٹھویں پوزیشن پر آنے والی ٹیموں کو فی ٹیم ایک کروڑ 90 لاکھ ڈالرز ملیں گے، جبکہ نویں سے سولہویں پوزیشن کی ٹیموں کو ڈیڑھ کروڑ ڈالرز فی ٹیم دیے جائیں گے۔ سترہویں سے بتیسویں پوزیشن تک آنے والی ہر ٹیم کو ایک کروڑ 10 لاکھ ڈالرز جبکہ تینتیسویں سے اڑتالیسویں پوزیشن پر آنے والی ہر ٹیم کو 90 لاکھ ڈالرز کی انعامی رقم دی جائے گی۔

اعلامیے میں مزید بتایا گیا ہے کہ ورلڈ کپ کیلئے کوالیفائی کرنے والی ہر ٹیم کو تیاریوں کے لیے اضافی 15 لاکھ ڈالرز بھی فراہم کیے جائیں گے۔ واضح رہے کہ فیفا ورلڈ کپ 2026 اگلے برس امریکا، کینیڈا اور میکسیکو میں منعقد ہوگا جس میں پہلی بار 48 ٹیمیں شرکت کریں گی۔