وزیرِ اعظم کی ڈیجیٹل نیشن پاکستان پروگرام پر عملدرآمد تیز کرنے کی ہدایت

وزیرِ اعظم شہباز شریف کی زیرِ صدارت وفاقی وزارتوں میں ‘ڈیجیٹل نیشن پاکستان’ پروگرام کے نفاذ سے متعلق اہم اجلاس منعقد ہوا، جس میں انہوں نے تمام وفاقی وزارتوں کو اپنے متعلقہ اعداد و شمار مرکزی اور قومی ڈیجیٹل پلیٹ فارم پر فوری فراہم کرنے کی ہدایت کی ہے۔ وزیرِ اعظم نے زور دیا کہ مرکزی ڈیٹا سینٹر حکومتی خدمات کو شفاف بنانے اور شہریوں کو تیز ترین سہولیات کی فراہمی میں کلیدی کردار ادا کرے گا۔

اجلاس میں وزیرِ اعظم نے کہا کہ تمام شعبوں کا ڈیٹا ایک ہی جگہ دستیاب ہونے سے معاشی منصوبہ بندی اور ملکی ترقی میں مدد ملے گی، جبکہ وزارتوں کی ڈیجیٹائزیشن سے بدعنوانی اور ادارہ جاتی بد نظمی کا خاتمہ ممکن ہو سکے گا۔ انہوں نے ایندھن پر سبسڈی اسکیم کی کامیاب ڈیجیٹل تطبیق اور قومی سطح پر یکساں طبی ریکارڈ مرتب کرنے سے متعلق وزارتِ صحت کی کاوشوں کو سراہا۔ اس کے علاوہ معیاری ادویات کی فراہمی یقینی بنانے کے لیے ادویات کی پیکنگ پر کیو آر کوڈ (QR Code) کے نفاذ کے اقدام کی بھی خصوصی تعریف کی گئی