پاکستان، برطانیہ کا آئندہ ٹریڈ ڈائیلاگ میں عملی نتائج کے حصول پر اتفاق

وفاقی وزیر تجارت جام کمال خان سے برطانوی ہائی کمشنر جین میریٹ (Jane Marriott) نے اسلام آباد میں اہم ملاقات کی، جس میں پاکستان اور برطانیہ کے درمیان دوطرفہ تجارت، طویل المدتی سرمایہ کاری اور مختلف شعبوں میں شراکت داری کو مزید مضبوط بنانے پر تفصیلی تبادلہ خیال کیا گیا۔ اجلاس میں سیکرٹری تجارت جواد پال اور دیگر اعلیٰ حکام بھی موجود تھے۔ فریقین نے آئندہ ٹریڈ ڈائیلاگ سے ملموس و عملی نتائج کے حصول پر زور دیتے ہوئے صحت، آئی ٹی، زراعت، لائیو اسٹاک، مالیاتی خدمات، ہوا بازی اور معدنیات کے شعبوں میں تعاون کے وسیع امکانات کا جائزہ لیا۔

ملاقات کے دوران پاکستان انٹرنیشنل ایئرلائنز (PIA) کے فلیٹ کی جدید کاری کے لیے ایئربس اور رولز رائس سے طیاروں اور انجنوں کی ممکنہ لیزنگ اور خرید کے آپشنز پر بات چیت کی گئی۔ برطانوی ہائی کمشنر نے پاکستان کی معاشی و ٹیکس اصلاحات کو سراہا، جبکہ جام کمال خان نے برطانوی ٹیکنالوجی اور سرمایہ کاری کے ذریعے پاکستانی لائیو اسٹاک، پنک سالٹ، زیتون اور ٹیکسٹائل مصنوعات کی عالمی برانڈنگ اور برآمدات بڑھانے پر زور دیا۔ دونوں رہنماؤں نے 2027ء میں پاکستان کی 80ویں سالگرہ کے موقع کو تجارتی، تعلیمی اور ثقافتی تعلقات کے مزید فروغ کے لیے خصوصی طور پر استعمال کرنے پر بھی اتفاق کیا۔