کرک: مسلح افراد کی فائرنگ سے ایس ایچ او سمیت 2 اہلکار شہید

خیبرپختونخوا کے ضلع کرک میں دہشت گردی و بدامنی کا افسوسناک واقعہ سامنے آیا ہے، جہاں مسلح افراد کی جانب سے پولیس موبائل پر اندھا دھند فائرنگ کے نتیجے میں تھانہ بانڈہ داؤد شاہ کے ایس ایچ او سمیت 2 پولیس اہلکار شہید ہو گئے۔

پولیس حکام کے مطابق واقعہ کرک میں نیو کڑپہ کے مقام پر پیش آیا، جہاں گشت پر مامور پولیس ٹیم کو مسلح ملزمان نے اچانک نشانہ بنایا۔ فائرنگ کے نتیجے میں ایس ایچ او داؤد خان اور ان کے گن مین فرہاد موقع پر ہی زخموں کی تاب نہ لاتے ہوئے جامِ شہادت نوش کر گئے۔ واقعے کی اطلاع ملتے ہی ڈسٹرکٹ پولیس آفیسر (DPO) کرک عمران خان بھاری نفری کے ساتھ جائے وقوعہ پر پہنچے اور علاقے کو گھیرے میں لے کر ملوث مسلح ملزمان کی گرفتاری کے لیے وسیع پیمانے پر سرچ آپریشن شروع کر دیا ہے۔