سندھ میں تقرریاں نہ لینے والے 63 میں سے 20 سب رجسٹراروں کی معطلی سفارش

سندھ کے بورڈ آف ریونیو میں مبینہ کرپشن، پسند و ناپسند اور قوانین کی سنگین خلاف ورزیوں کا نیا انکشاف سامنے آیا ہے۔ ترقی پانے کے بعد نئی جگہوں پر تقرریوں سے انکار کرنے والے کل 63 سب رجسٹراروں میں سے مبینہ طور پر دوہرے معیار کا مظاہرہ کرتے ہوئے صرف 20 افسران کو معطل کرنے کی سفارش کی گئی ہے، جبکہ 43 بااثر اور منظورِ نظر افسران کو کارروائی سے بچا لیا گیا ہے۔ سینئر ممبر بورڈ آف ریونیو خالد حیدر شاہ نے اس سلسلے میں وزیراعلیٰ سندھ کو متنازع سمری ارسال کی ہے۔

ذرائع کے مطابق معطلی سے بچائے گئے 43 افسران کا تعلق اہم سیاسی شخصیات اور موجودہ و سابق صوبائی وزرا سے ہے، جس کے باعث سارا ملبہ صرف 20 بے بس افسران پر ڈال دیا گیا ہے۔ قواعد و ضوابط کے مطابق ترقی قبول نہ کرنا افسر کا قانونی حق ہے، تاہم اس معاملے میں قوانین کو پسِ پشت ڈال کر انتقامی کارروائی کی جا رہی ہے۔ ذرائع کا مزید کہنا ہے کہ اس تمام تر اقدام کا مقصد 6 ماہ کی لازمی تربیت مکمل کیے بغیر کراچی سمیت دیگر اہم شہروں کے منافع بخش عہدوں پر پسندیدہ افسران کو تعینات کرنا ہے۔ متاثرہ سب رجسٹراروں نے اس ناانصافی کے خلاف عدالت سے رجوع کرنے کا حتمی فیصلہ کر لیا ہے۔