بیلاروسی وفد کی جی ایچ کیو آمد، فیلڈ مارشل سید عاصم منیر سے ملاقات

پاک فوج کے شعبہ تعلقات عامہ (آئی ایس پی آر) کے مطابق بیلاروس کی سکیورٹی کونسل کے سٹیٹ سیکرٹری لیفٹیننٹ جنرل الیگزینڈر وولفوچ نے ایک اعلیٰ سطح کے وفد کے ہمراہ جی ایچ کیو کا دورہ کیا اور فیلڈ مارشل سید عاصم منیر سے ملاقات کی۔ ملاقات کے دوران علاقائی و عالمی سیکیورٹی صورتحال، باہمی دلچسپی کے امور اور دوطرفہ دفاعی تعاون کے دائرہ کار کا تفصیلی جائزہ لیا گیا۔ اس موقع پر فیلڈ مارشل سید عاصم منیر نے اس عزم کا اظہار کیا کہ پاکستان دفاع اور سیکیورٹی کے شعبوں میں بیلاروس کے ساتھ تعلقات کو مزید وسعت دینا چاہتا ہے۔ بیلاروسی وفد نے خطے میں امن و استحکام کے فروغ کے لیے پاکستان کے کلیدی کردار کی بھرپور تعریف کی اور دونوں ممالک کے درمیان دفاعی اور سیکیورٹی تعاون کو مزید مضبوط بنانے کے عزم کا اعادہ کیا۔