محسن نقوی، طلال چوہدری سے برطانوی وزیر مملکت خارجہ امور سٹیفن ڈوٹی کی ملاقات

وفاقی وزیر داخلہ محسن نقوی اور وزیر مملکت طلال چودھری سے برطانوی وزیر مملکت برائے خارجہ امور سٹیفن ڈوٹی نے اہم ملاقات کی، جس میں پاک برطانیہ تعلقات، غیر قانونی امیگریشن، انسدادِ منشیات اور انسدادِ دہشتگردی کے شعبوں میں باہمی تعاون بڑھانے پر تفصیلی تبادلہ خیال کیا گیا۔ ملاقات کے دوران جعلی سٹوڈنٹ ویزوں کے ذریعے برطانیہ جانے کے رجحان کی روک تھام کے لیے مشترکہ طور پر سخت اقدامات اٹھانے پر زور دیا گیا، جبکہ غیر قانونی سرگرمیوں کے تدارک کے لیے پاکستان اور برطانیہ کے درمیان ایک مفاہمتی یادداشت (ایم او یو) پر دستخط کرنے پر بھی اتفاق ہوا۔ وزیر داخلہ محسن نقوی نے اس موقع پر بتایا کہ اے این ایف نے برطانیہ سمگل کی جانے والی 55 میٹرک ٹن منشیات ضبط کی ہیں، اور جعلی ویزوں کے ذریعے بیرون ملک جانے والوں کے خلاف سخت جانچ پڑتال ناگزیر ہے۔ برطانوی وزیر سٹیفن ڈوٹی نے پاکستان میں آن لائن فراڈ میں ملوث عناصر کے خلاف کارروائیوں کو سراہا، جبکہ ملاقات میں مشرق وسطیٰ کی صورتحال اور افغانستان کے ساتھ سرحدی امور پر بھی غور کیا گیا۔