صومالی بحری قزاقوں سے بازیاب تین پاکستانی کراچی پہنچ گئے

آنر 25 بحری جہاز کے صومالی بحری قزاقوں کے قبضے سے بازیاب ہونے والے تینوں پاکستانی کریو ممبرز وطن واپس پہنچ گئے ہیں۔ ایتھوپین ایئر لائن کے ذریعے کراچی ایئرپورٹ پہنچنے والے شہریوں میں حسین یوسف، عمران علی (جن کا تعلق کراچی سے ہے) اور محمد یاسین (سوات کے رہائشی) شامل ہیں۔ کراچی ایئرپورٹ پر گورنر سندھ سید محمد نہال ہاشمی اور میئر کراچی مرتضیٰ وہاب نے تینوں افراد کا پرتپاک استقبال کیا اور انہیں گلدستے پیش کیے۔ اس موقع پر گورنر سندھ نے کہا کہ وزیراعظم پاکستان اس پورے معاملے پر ذاتی طور پر مانیٹرنگ کرتے رہے اور ریاست اپنی استطاعت کے مطابق متاثرہ خاندانوں کی کفالت، بچوں کی تعلیم، صحت اور رہائشی پلاٹس کی فراہمی کے لیے تمام اقدامات اٹھائے گی۔ تینوں پاکستانی دو روز قبل صومالیہ سے ادیس ابابا پہنچے تھے جہاں سے آج وہ بخیر و خوبی وطن واپس پہنچ گئے ہیں۔