فیلڈ مارشل سے انتونیو گوتریس کی ملاقات: سکیورٹی، کشمیر اور سندھ طاس معاہدے پر تبادلہ خیال

اقوام متحدہ کے سیکرٹری جنرل انتونیو گوتریس نے جی ایچ کیو راولپنڈی کا دورہ کیا جہاں انہوں نے فیلڈ مارشل سید عاصم منیر سے اہم ملاقات کی۔ پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران جموں و کشمیر کے دیرینہ تنازع، بھارت کی جانب سے سندھ طاس معاہدے کو التوا میں رکھنے کے اقدامات اور افغانستان سے پیدا ہونے والے سکیورٹی چیلنجز سمیت دہشت گردی کے امور پر تفصیلی تبادلہ خیال کیا گیا۔ فیلڈ مارشل سید عاصم منیر نے بین الاقوامی امن و سلامتی کے لیے پاکستان کے غیر متزلزل عزم کا اعادہ کرتے ہوئے اقوام متحدہ کے امن مشنز میں ملک کی لازوال قربانیوں کو اجاگر کیا اور سیکرٹری جنرل کے انسانی ہمدردی کے کردار کو سراہا۔ دوسری جانب، انتونیو گوتریس نے دہشت گردی کے خلاف جنگ میں پاکستان اور اس کی مسلح افواج کی قربانیوں کو بھرپور خراج تحسین پیش کرتے ہوئے علاقائی تنازعات کے پرامن حل کے لیے پاکستان کی مساعی کا اعتراف کیا۔