ایران اور امریکا کے درمیان مذاکرات اور پیغامات کا تبادلہ جاری ہے: قطر

قطر نے تصدیق کی ہے کہ اس کی ثالثی میں ایران اور امریکہ کے درمیان مذاکرات اور پیغامات کا تبادلہ جاری ہے، جن کا بنیادی مقصد فریقین کے درمیان کسی قابلِ عمل حل تک پہنچنا ہے۔ قطری وزارتِ خارجہ کے شعبہ اطلاعات کے ڈائریکٹر ابراہیم بن سلطان الہاشمی نے پریس کانفرنس سے خطاب کرتے ہوئے کہا کہ ان مذاکرات میں تمام فریقوں کے تحفظات اور خدشات کو مدِ نظر رکھا جا رہا ہے۔ اس کے ساتھ ساتھ قطر نے سعودی عرب، ترکیہ اور پاکستان کے درمیان طے پانے والے ‘مکہ دفاعی معاہدے’ کی پرزور حمایت کا اظہار بھی کیا۔ قطری عہدیدار کا کہنا تھا کہ یہ اتحاد خطے کے ممالک کے وسائل کے تحفظ اور سکیورٹی کو یقینی بنانے کے لیے علاقائی تعاون کو مزید مضبوط بناتا ہے، اور قطر خطے کی سلامتی، خودمختاری اور علاقائی سالمیت کے تحفظ کے لیے کیے جانے والے ہر اقدام کی بھرپور حمایت کرتا ہے۔